「四大天王」的名號已出現了十一年，郭富城亦紅了足足十一年。到了今時今日，他會叫你不要再講「四大天王」， 因為人應該與時並進，亦不應問他紅定唔紅，因為他會笑你：「我們呢o的過十年o既，講o既係實力，講o既再唔係紅唔紅。」
「紅」只是一個短暫現象，他希望做到的是長期受歡迎，正如上半年他已拍了幾個廣告，下半年尚有四個廣告接洽中， 他說得有點得意：「你唔受歡迎，搵你拍喎！」在娛樂圈逾十年的他，心態明顯不同，他會為花千萬買車而肉痛， 亦思考自己應該如何突破，期望可建立如麥當娜的超然地位。

心態：紅唔紅見仁見智

問：紅了十一年，會唔會覺得自己冇高峰時咁紅？
答：紅唔紅o既定義o係邊？何謂紅？紅唔紅o既定義，人人唔同，好多時紅人唔紅歌，有時係紅歌唔紅人，咁點計數？ 我本身o黎講，話我謙虛又好，永遠唔會覺得自己好紅，我覺得最重要係有機會工作，我唔係一 步登天o既人，我腳踏實地o左咁多年，紅唔紅都係咁做o野，我唔會o係紅同唔紅o既定義度去計較，最重要係睇你有冇誠意去做o野。 如果係新人就講紅定唔紅，我o地呢o的過十年講o既係實唔實力，等於依家仲有冇人講我o地〈四大天王〉好紅，因為過時啦！ 我覺得唔好講呢樣o野係o岩，因為潮流係與時並進。

問：到底有冇諗過自己依家o既位置？
答：唔好成日去諗自己紅定唔紅，好似我自己咁，手頭上咁多個廣告搵我拍，如果我唔受歡迎，鬼搵你呀！人o地俾錢你，搵你拍喎！ 你有乜o野好，人搵你梗有原因。我只會去諗有冇人去欣賞你，今年上半年拍咁多廣告，依家仲有四個廣告傾緊， 我諗我o向廣告商o既心目中已經超越紅唔紅。

問：未來你有乜o野目標？
答：我依家想去建立一個比較超然o既地位，個一個實力o既歌手，正如麥當娜，你話佢紅唔紅呀？你話佢唔紅我會笑你， 麥當娜已經唔係講紅定唔紅，但係佢會有一個超然o既地位，可以講佢係我o既典範。俾你好紅，你冇實力，又有乜用， 紅只係一個現象，我希望自己係屬於受觀眾去支持o個種，真正長期受歡迎先至係No.1。

大計：期待予人新鮮感

問：呢一年你在電影方面靜了，是否受到與唐季禮合作《雷霆戰警》發生不快而影響？
答：都唔會有影響，同我合作過o既人都知我個人係點，一直到依家都有好多投資者想搵我拍戲，我完全唔擔心， 我可以講同我合作過就知我專業。

問：最近唐季禮宣佈因你普通話不好，《岳飛》一片因此要易角？
答：我係一個接受批評o既人，最重要講o既係咪事實， 唔會唔開心，我依然會祝唐季禮o既新戲會有好成績。

問：電影方面，有冇諗過自己要行o既路？
答：依家傾緊o既都係我好想拍o既戲，角色好o岩我，咁多年我o既歌手形象太深入民心，冇人會覺得Aaron係一個演員， 係《浪漫風暴》o既拳手，《風雲》o既卡通化角色好受歡迎，我發現原來有好多人鍾意我做呢類角色，所以o黎緊我會行呢個方向。

問：唱片方面，係咪已經定出方向？
答：今年有唔少計畫，我依家學緊音樂，希望可以將自己磨利o的，今年內可以出一張自我創作o既唱片， 希望可以全部o既歌不論曲同詞都係我郭富城去寫。我好有信心，因為我已經作o左第一首歌，新碟我會一手包辦， 希望帶俾人有新鮮感。

至愛：賽車可以玩一世

問：花了千萬金錢去玩車，會唔會肉痛？
答：到依家都覺得好肉痛，但係冇辦法，以現在o既市道o黎講，我買一架新車返o黎，(渣)兩年o既話， 車價只會係買o既時候一半以下。我依家有五架車，真係代步o既得四，唔換車亦都係因為個折舊率太犀利，我好肉痛， 所以我唔賣車，除非有架車好吸引先至考慮。

問：係咪想放棄玩車呢個嗜好？
答：我係一個好鍾意車o既人，不過依家(渣)車比以前少o左好多，亦都唔會見到我成日落場賽車，不過愛車o既性格依然冇變。 我喜歡賽車o既感覺，同拿冠軍o既滋味，可以講賽車係我一生o既興趣，只係今年唔得閒去賽車，其實賽車係可以玩一世， 就算到六十歲都可以(渣)唔同o既車，參加唔同o既賽車。

問：你五年冇買車，但係你舊年用過千萬買一間新屋喎？
答：以前就話會買架車o黎獎勵自己，但係依家我追求o既o野已經唔同，我會追求住o既環境，所以我買o左間新屋， 反而一個舒服o既休息地方，先至緊要。

後記：愛車亦愛狗

三十多歲的郭富城還像一個大細路，訪問期間，只見一名菲傭拖著兩隻小狗行過，他突然打斷訪問說： 「喂！快o的出去同兩隻狗仔影相。」
攝影師被他這舉動殺個措手不及，即隨城城跑出餐廳，把城城逗玩小狗的情況全攝入鏡。原來城城愛車之外也愛狗， 但一想到他連愛車也發生因久冇撻車而死火的情況，如果是他養狗也是一個「死火」的答案，咁就認真大鑊。
問這名大細路有否想過結婚，他說：「有冇拍拖都好，我覺得冇必要公開，總之我依家好滿意我o既獨身生活。」

2002年5月18日
太陽報
文：鄒景新
攝：倪立煌
打字：Joey