昨日有報道指《太陽計劃2005—南區永不放棄太陽夜》主辦單位為了縮皮，若然出席演出歌手想加設特別效果，便需要收取附加費。昨有份表演的歌手對此亦發表意見，其中自費放紙炮的容祖兒則認為，這些特別效果只是輔助性質，更笑言若想看煙花，可留待年初二才看。
【本報記者康蕎報道】有報道指港台為了開源節流，舉行活動時，歌手們若想在演出時加添其他效果，便要逐項收費，例如安排一位舞蹈員伴舞需四千元、煙花或紙碎效果助慶則各收六千大元。就此消息，問到昨午出席綵排的節目總監周國豐，他澄清說︰「其實港台一直以嚟都冇Dancer提供畀歌手，亦冇同出席歌手收過一毫子，港台咁耐都冇提出乜嘢表演規格，冇要求藝人一定要畀錢我哋去提供Dancer同放煙花，若果想放煙花，我哋會畀一個聯絡電話，叫佢哋自己搵人傾，更何況今年都冇申請煙花牌照，根本就唔可能放煙花。」
獲Deep讓紙炮位
昨日綵排時，見吳浩康Deep帶了四位Dancer出現，笑問到Deep此舉是否需付上一萬六千大元時，他解釋說︰「其實我根本唔知發生咩事，我由排舞到每次出騷身邊嘅Dancer都要畀錢㗎啦！（咁今晚你有冇畀錢放紙炮？）冇喎！我試過畀紙炮嚇到走音，都係留番畀祖兒放，佢經驗夠，會淡定過我好多。」
至於會自費放紙炮的容祖兒則說︰「其實放紙炮都係輔助作用，我都唔係好理呢啲嘢，有冇我都唔介意，人哋唔係睇你放煙花，想睇咪留番年初二晚囉！」至於有六位Dancer伴舞的郭富城就說︰「我一向演出都多Dancer，佢哋係我自己請嘅，其實出席今次活動係因為之前幾年我都忙冇時間，今年有空檔我就嚟支持，有Dancer同紙炮，公司都覺得咁做係值得，又唔係我個人演唱會，唔係嚟攞威！」而同樣出席的李克勤就認為︰「如果一啲人有一啲人冇，會令人覺得唔公平，依家一視同仁就唔會有問題啦，都係一件好事。（你有實力唔需要花巧嘢？）咁有就錦上煙花，冇咪欣然接受囉﹗」
愛小孩想生仔
此外，祖兒前晚憑《明日恩典》奪得「兒歌金獎」，她開心地說：「今次得兒歌獎真係好高興，呢首亦係我同兒童合唱團唱嘅歌。加上出席兒歌頒獎禮又冇壓力，我同小朋友合作好有默契，大家可以溝通到，反而我唔明大人嘅說話，所以我好希望將來可以唱多嘅兒歌，開拓唔同嘅市場。」
喜愛小朋友的祖兒被問，將來又會生多少個小朋友時，她說：「唔知呢！生一個試吓先，如果將來自己啲小朋友可以永遠係一、兩歲就好嘞，因為小朋友到十二、三歲就會頭髮變粗、開始變聲、又容易學壞喎！冇晒BB嘅感覺，以前我細佬變聲嘅時候都好嚇人㗎！」
)