昨日是郭富城（城城）四十歲牛一的大日子，城城在跑馬地寓所逗留到晚上十時三十分出動，他頭戴啡色格仔帽及身穿一件普通的TEE加牛仔褲打扮，而城城未有駕駛其法拉利追女戰車，反而是乘坐開工用的保母車到銅鑼灣醉八仙居酒屋與朋友食飯慶祝。
【本報記者康蕎報道】抵達酒樓時，心情勁靚的城城停下腳步讓記者拍照才上樓，而他的一眾好友早已抵達上址等壽星仔出現吹蠟燭。
十二點吹蠟燭後，見張智霖單拖先行離開，問到他女友袁詠儀為何沒有出席時，張說︰「靚靚唔喺香港嘛﹗(你送咩禮物畀城城﹖)我頭先未送，遲吓我打算送部單車畀佢踩，因為呢排我自己愛上咗踩單車﹗」
及後，到場為城城祝壽的無綫高層何麗全夫婦、林小明夫婦等開始陸續離開，其間見眾人手上都握着城城剛推出的演唱會DVD，相信是城城送給他們珍藏的禮物。而問到林小明送甚麼生日禮物給城城時，他就問非所答地說︰「梗係最緊要希望佢攞到《金馬獎》啦﹗」
城城醉意答非所問
到凌晨三時四十分飲至面紅紅的城城才由小美及張叔平陪同離開，其間城城雖然有幾分醉意，但仍樂意接受訪問，對於一眾好友為他搞Party慶祝，城城開心地說︰「班朋友真係好有心，佢哋好忙都嚟，心目中呢份友情係最重要﹗」及後問到城城出席的朋友當中是否有他心儀的女性時，他開始問非所答地說︰「好多謝班朋友同我過咗呢個咁特別時刻，嚟得都係我最真嘅朋友﹗感情世界我要求好簡單，緣份隨緣﹗我會放時間喺工作上而唔係感情，好多朋友都話我要搵番個女朋友，但因為自己有好多理想未達到，希望達到理想先組織家庭。」笑問到城城是否喝醉﹖他即老實地回答說︰「係吖，半醉啦﹗我依家暈暈哋﹗wing wing哋﹗」及後又不忙多謝在場傳媒捱更抵夜採訪他，之後城城就由小美等扶上保母車，約凌晨四時返回跑馬地寓所休息。
)
