郭富城早前訂購價值千萬、有「幽靈之子」之稱的超級名跑車Zonda F於日前運到香港，前晚這部跑車的設計師Mr. Pagani向城城頒發「亞洲超級車主」證書及進行車匙接交儀式。曾被拍到揸法拉利載翻版藤原紀香的城城，可能見到「新老婆」心情零舍興奮，他直言新車只載「正版」，並謂對方剛剛生日，亦有送e卡祝賀她。另外同場的蔡加敏亦透露家中有30多部名車總值過億，並會輪流使用。
【新報訊》記者早兒報道﹕城城這部新寵兒價值千二萬元，其一優點是右軚，能夠在港駕駛。不像以往要運到內地才能用車。問到城城這樣一擲千萬購買，是否慶祝以半億身價過檔新唱片公司，他即否認，並指買車一向是作為收藏及欣賞，希望下次可買銀色開篷「幽靈之子」。城城表示因為最近忙做新碟，要下月才有時間試車，相信現在會常心掛掛。
對於日前有報道指城城過去十多部車總值3000萬，他說只是閑錢。記者們笑指他大口氣時，他又笑稱自己一向低調，甚少講車，只是今次才談起來。問到平日如何打理他的「老婆」，城城說﹕「因為工作關係，所以有幾部車要拎去汽車公司打理。」
樂做鑽石王老五
所謂香車美人，問到城城新車想載誰時，他坦言﹕「當然係載靚女啦﹗不過暫時未有對象，邊個想坐就車佢啦﹗（張智霖想坐呀﹗）好呀﹗係朋友都可以坐，我鍾意載朋友㗎﹗新車只得兩個位，係趕絕外母型呀﹗（會唔會一個月裏面搵到個靚女配靚車﹖）冇啦，做鑽石王老五都幾好﹗」
曾被拍到用過法拉利載過一位翻版藤原紀香的城城，被問到新車會否接載對方時，他笑說﹕「只載正版，唔載翻版﹗哈哈﹗（咁叫紀香試新車﹖）我哋都有聯絡，會同佢講我買咗新車，仲可以Send相畀佢睇。佢啱啱過咗生日，我都有Send e卡畀佢。（唔直接打電話畀佢﹖）朋友生日我都係Send e卡。（會唔會運架車去日本，等紀香試坐﹖）唔想多講感情，哈哈﹗」說罷，他又改歌詞唱「越問越想有（指有女友）」，場面搞笑。
蔡加敏愛車一族
另外，蔡加敏和堂弟蔡加頌亦有到場，蔡加敏指如要花千二萬買車，就要視乎有多喜歡，若喜歡的話就捨得花費。此外，原來蔡家都是愛車一族，蔡加敏說﹕「因為爸爸（蔡志明）特別愛車，我哋全家加起嚟有30多部車，最貴一部價值千萬嘅古董勞斯萊斯，全部加埋過億。我平時多數揸法拉利、波子同Benz代步。」她亦透露每月養車費都要花上數十萬元。
蔡加敏又坦言曾試過開快車，她說﹕「我都有諗過賽車，但冇信心揸『幽靈之子』，亦唔會用車襯衫，只會配合場合同心情，天氣好心情好就揸開篷車﹔心情唔好就踩快啲。試過俾人撩鬥車，不過係安全情況下嗰種。」
)
